Ég er ekki norn

Urður bókafélag gefur út bókina Ég er ekki norn eftir sænska rithöfundinn Kim M. Kimselius í íslenskri þýðingu Elínar Guðmundsdóttur.

Hér er á ferðinni önnur bókin um stúlkuna Ramónu sem ásamt Theó félaga sínum ferðast um í tíma og kynnist þannig mörgum af merkustu atburðum mannkynssögunnar af eigin raun. Fyrsta bók höfundar, Aftur til Pompei, kom út hjá Urði bókafélagi fyrir síðustu jól og naut mikilla vinsælda en hún var m.a. á meðal bestu þýddu barna- og unglingabóka síðasta árs að mati starfsfólks bókaverslana.

Kim M. Kimselius hefur gefið út 16 bækur sem allar hafa notið mikilla vinsælda í Svíþjóð og hafa bækur hennar verið gefnar út á fjölda tungumála. Sögulegar skáldsögur hennar um þau Ramónu og Theó eru 13 talsins en auk þess að vera mjög skemmtilegar aflestrar eru bækurnar einkar fróðlegar og hafa þær m.a. verið notaðar sem ítarefni við sögukennslu í sænskum skólum.

Eins og nafnið gefur til kynna gerist Ég er ekki norn á tímum nornaofsókna á 17. öld. Þetta er æsispennandi og skemmtileg frásögn fyrir fróðleiksfúsa unglinga á öllum aldri. Bók sem óhætt er að mæla með.

Um Guð

Urður bókafélag gefur út bókina Um Guð eftir sænska rithöfundinn Jonas Gardell. Í bókinni fjallar Gardell, sem í nær aldarfjórðung hefur verið einn allra vinsælasti rithöfundur og skemmtikraftur Svíþjóðar, um Gamla testamentið á sinn eigin hátt.

Hvernig varð hugmyndin um Guð til? Hvernig getur Guð verið í senn kærleiksríkur og blóðþyrstur? Hvenær kom hugmyndin um eilíft líf fram? Hvað eru margar sköpunarsögur í Biblíunni? Allt eru þetta spurningar sem Gardell veltir upp og leitar svara við í þessari bók.

Um Guð er einkar áhugaverð bók sem óhætt er að mæla með.

Dr. Valtýr - Ævisaga

Urður bókafélag gefur út bókina Dr. Valtýr – Ævisaga, eftir Jón Þ. Þór sagnfræðing, í kilju í tilefni þess að hinn 11. mars nk. eru 150 ár liðin frá fæðingu dr. Valtýs Guðmundssonar. Bókin kom áður út hjá Bókaútgáfunni Hólum árið 2004 en seldist upp og hefur verið ófáanleg um nokkurt skeið.

Í bókinni eru ævi og starfsferill þessa merka fræði- og stjórnmálamanns rakin auk þess sem fjallað er ítarlega um áherslur hans í stjórnmálum. Óhætt er að fullyrða að fáir íslenskir stjórnmálamenn hafa verið jafn umdeildir og Valtýr Guðmundsson var um aldamótin 1900. Valtýskan, stefna sú er hann mótaði og fylgdi í sjálfstæðisbaráttu þjóðarinnar, klauf þjóðina í tvennt en hún var þó fráleitt hans eina baráttumál enda var dr. Valtýr mikill áhugamaður um uppbyggingu íslensks atvinnulífs. Hann átti mikinn þátt í stofnun Íslandsbanka (elsta) árið 1904, lagningu sæsíma til Íslands og hafði forystu um stofnun Fiskveiðasjóðs Íslands árið 1905, svo nokkur dæmi séu nefnd.

Hann var kennari í íslenskum bókmenntum og sögu við Hafnarháskóla í tæp 40 ár, mikilvirkur fræðimaður og rithöfundur og stofnaði tímaritið Eimreiðina, eitt vinsælasta tímarit sem út hefur komið á íslensku. Því ritstýrði hann, og gaf út, í rúma tvo áratugi en í Eimreiðinni birtu ýmis þekkt skáld og og ungir rithöfundar sínar fyrstu ritsmíðar, t.d. Davíð Stefánsson frá Fagraskógi og Gunnar Gunnarsson.

Ég er ekki norn!

Það er okkur hjá Urði bókafélagi mikil ánægja að tilkynna að ákveðið hefur verið að önnur bók Kim M. Kimselius kemur út á þessu ári þó enn hafi ekki verið alveg ákveðið hvenær á árinu það verður. Bókin heitir á sænsku Jag är ingen Häxa! og hefur í íslenskri þýðingu fengið titilinn Ég er ekki norn! Nánar verður tilkynnt um útgáfuna hér á bloggi Urðar þegar útgáfudagur liggur fyrir.

 

Hér að neðan má finna stuttan úrdrátt úr bókinni:

 

„Nei, ekki aftur!ˮ hrópar Ramóna skelkuð.

Theó veit nákvæmlega hvers vegna hún hrópaði: Nýtt tímaflakk! Hvert færu þau nú?

Á næsta andartaki standa þau við logandi bál þar og efst á því er stöng sem ung stúlka er bundin við. Þau hika hvergi og reisa stiga við bálið. Ramóna klifrar upp og leysir stúlkuna.

Fólk stendur sem steinrunnið kringum bálið og horfir á þau. En þegar Ramóna, Theó og stúlkan leggja á flótta upphefjast miklar nornaveiðarnar. Þau hafa hafnað á tíma galdrafárs. Brátt verða þau sökuð um galdra og þeirra bíða sömu örlög og þau björguðu stúlkunni frá.

 

Ritdómur um Rússland Pútíns

Í nýjasta tölublaði veftímaritsins Stjórnmál og stjórnsýsla, sem gefið er út af Stofnun stjórnsýslufræða og stjórnmála við Háskóla Íslands er að finna ritdóm um bókina Rússland Pútíns eftir rússnesku blaðakonuna Önnu Politkovskaju, sem Urður bókafélag gaf út á árinu.

Í ritdómnum sem er eftir Pétur Berg Matthíasson, stjórnmála- og stjórnsýslufræðing, er efni bókarinnar rakið í mjög stuttu máli og í niðurlaginu segir m.a.:

„Allir sem lesa þessa bók verða fyrir vonbrigðum með það sem er að gerast í Rússlandi. Ljóst er að Rússland á langt í land að verða lýðræðisríki þar sem mannréttindi eru virt. Þessi bók er nauðsynleg fyrir alla þá sem vilja skyggnast bak við tjöldin og sjá Rússland eins og það er í raun og veru.“

Smelltu hér til að lesa dóminn í heild sinni.

Rússland Pútíns má nálgast í öllum helstu bókabúðum landsins og hana má einnig panta beint með því að smella hér og senda póst til Urðar bókafélags. Þetta er bók sem á erindi í alla pakka.

Ný prentun af Aftur til Pompei komin

Eins og fram kom hér á bloggi Urðar bókafélags í síðustu viku var fyrsta prentun Aftur til Pompei eftir Kim M. Kimselius á þrotum hjá útgefanda en ný prentun væntanleg.

Bækurnar nýprentuðu eru nú komnar í hús og um að gera að tryggja sér eintak af þessari frábæru og mjög fróðlegu unglingabók sem m.a. hefur verið notuð sem ítarefni við sögukennslu í sænskum grunnskólum. 

Aftur til Pompei lenti í þriðja sæti í vali starfsfólks bókaverslana á bestu þýddu barnabókunum, smelltu hér til þess að sjá frétt um valið.

Aftur til Pompei meðal bestu þýddu barnabóka

Aftur til Pompei eftir Kim M. Kimselius í íslenskri þýðingu Elínar Guðmundsdóttur, sem Urður bókafélag gefur út, varð í þriðja sæti á lista starfsfólk bókaverslana yfir þýddar barnabækur í jólabókaflóðinu í ár.

Fréttablaðið birtir í dag frétt um verðlaunaveitingu starfsfólks bókaverslana og um leið lista yfir þær bækur sem lentu í efstu sætum. Þar segir m.a. að sextíu bóksalar hafi tekið þátt í valinu.

Smelltu hér til þess að sjá frétt Fréttablaðsins.

 

Álit ungra lesenda á Aftur til Pompei

DV fékk hina 13 ára gömlu Maríu Gústavsdóttur til þess að skrifa ritdóm um Aftur til Pompei eftir Kim M. Kimselius og fékk bókin fjórar stjörnur hjá ritrýninum unga sem segir hana bæði spennandi og áhrifaríka. „Mér finnst þessi bók segja manni að flestir ættu bara að vera ánægðir með líf sitt eins og það er og þakka fyrir að geta lifað góðu lífi,“ segir María m.a. í dómnum.

Ritdóm Maríu má finna með því að smella hér.

Þá hefur Stefán Snær Friðriksson, sem einnig er 13 ára gamall, sent Urði bókafélagi stuttan dóm um bókina sem hann gefur þrjár stjörnur.

Ritdóm Stefáns Snæs má lesa hér að neðan:

„ Bókin Aftur til Pompei er ágæt bók. Hún var ekki neitt sérstök í byrjun því það var bara eiginlega ekki neitt að gerast en hún batnaði.

Bókin fjallar um stelpu sem fer að skoða rústir Pompei, hún sofnar á bekk og kemst á einhvern hátt aftur til fortíðar. Í fortíðinni reynir hún að vara íbúana við þeim hörmungum sem beið þess þ.e.a.s. eldgos úr eldfjallinu Vesúvíusi. Hún var of sein að vara fólkið við en tókst sjálfri að komast í skjól á meðan þúsundir manns dóu í hörmungunum.

En hvernig komst þessi stelpa i fortíðina og aftur til framtiðar? Það skildi ég ekki alveg. Ég les nú ekkert rosalega mikið (hlusta meira á íslendingasögurnar á hljóðbókum) en þessi bók var bara allt í lagi. Mér líkaði það vel að hún á sér stoð í sögunni, byggir á atburðum sem raunverulega gerðust.

Ég gef henni þrjár stjörnur.“

 

 

Aftur til Pompei

Urður bókafélag gefur út unglingabókina Aftur til Pompei eftir sænska rithöfundinn Kim M Kimselius og er hún komin í bókabúðir.

Bókin fjallar um Ramónu sem fer í skólaferðalag til Ítalíu til að skoða  uppgröftinn í borginni Pompei, borginni sem grófst undir ösku þegar eldfjallið Vesúvíus gaus árið 79 e. Kr. Ramónu er hálf ómótt og hún fær undarlega tilfinningu í allan líkamann þegar hún skoðar gifsafsteypur af íbúum borgarinnar sem fórust í eldgosinu. Hún skríður undir bekk til að hvíla sig og steinsofnar.

Skyndilega vaknar hún í fornri borg sem iðar af mannlífi. Hún hefur flust til í tíma og er stödd í Pompei fyrir eldgosið! Hún verður dauðskelkuð. Hún veit að borgin mun eyðast og allir íbúarnir farast, líka hún og Theó vinur hennar, sem hún kynntist í Pompei, ef þeim tekst ekki að forða sér í tæka tíð. En hún veit ekki hvenær eldfjallið Vesúvíus fer að gjósa. Verður það eftir hundrað ár, tíu ár eða tíu mínútur ... ?

Aftur til Pompei er fyrsta bók Kim M. Kimselius sem sló í gegn árið 1997. Bókin hefur verið þýdd á mörg tungumál og nýtur  vinsælda hjá breiðum aldurshópi. Kim M. Kimselius glæðir söguna um eldgosið í Pompei lífi og fer með lesandann í spennandi leiðangur aftur í tímann.

Um höfundinn og bækur hans

Sænski rithöfundurinn Kim M. Kimselius sló í gegn með fyrstu bók sinni Aftur til Pompei árið 1997. Allar götur síðan hefur hún notað sögulegar staðreyndir og frjótt ímyndunarafl til að skrifa spennandi söguleg ævintýri þar sem hún lýsir atburðum og lifnaðarháttum fólks fyrr á öldum. Í bókum hennar er mikill sögulegur fróðleikur og þær hafa heillað lesendur á öllum aldri. Þær eru m.a. notaðar í skólum sem ítarefni. Kim  M. Kimselius  hefur m.a. skrifað tólf bækur um ævintýri Ramónu og Theós og gerast þau á mismunandi tímum mannkynsögunnar, til dæmis í frönsku byltingunni, meðal víkinga og Inka í Suður-Ameríku, í Egyptalandi faróanna, á tímum Svarta dauða o.s.frv. Bækur Kimselius eru afar spennandi og erfitt er að leggja þær frá sér.

Rússland Pútíns vekur athygli fjölmiðla

Óhætt er að fullyrða að íslensk útgáfa Urðar bókafélags á Rússlandi Pútíns, bók Önnu Politkovskaju, hafi vakið töluverða athygli fjölmiðla hér á landi. Verðskuldaða athygli. Fréttablaðið birti viðtal við Elínu Guðmundsdóttur, þýðanda bókarinnar, sl. mánudag og Kristján Jónsson, blaðamaður á Morgunblaðinu, fjallaði um bókina í listapistli í blaðinu sl. þriðjudag. Fyrirsögn pistilsins var Bók fyrir viðkvæmar sálir? Nei!

Í pistli sínum lýsir Kristján, sem er þrautreyndur blaðamaður á erlendri fréttadeild Morgunblaðsins, bókinni í stuttu en hnitmiðuðu máli, og ýkir alls ekki þegar hann segir mynd þá er Politkovskaja dregur upp svo nístandi að hún lætur engan ósnortinn. Kristján segir bókina ekki viðkvæmar sálir en fáar bækur hafa vakið jafnmikla athygli í heiminum á undanförnum árum og Rússland Pútíns.

Allt síðan Vladimír Pútín tók við forsetaembættinu í Rússlandi af Boris Jeltsin hinn 7. maí 2000 hefur hann lagt allt kapp á að draga upp glansmynd af landi sínu. Samkvæmt þeirri mynd hefur Rússland verið eitt örast vaxandi hagkerfi heims og lífsgæði í landinu aukist verulega. Þetta er þó aðeins ytri ásýnd landsins en heima fyrir blasti allt önnur sjón við Önnu Politkovskaju og ýmsum samherjum hennar. Þessari sjón lýsir hún í Rússlandi Pútíns, tilfinningaþrunginni og áhrifamikilli frásögn hugsjónakonu sem gerði sér fyllilega grein fyrir þeirri hættu sem hún lagði sig í. Hún varð hins vegar að láta umheiminn vita af því sem gekk á í heimalandi sínu og það kostaði hana lífið.

Í áðurnefndum pistli sínum veltir Kristján Jónsson upp þeirri spurningu hvort við eigum að trúa Önnu Politkovskaju og segir síðan:

„Við getum aðeins reynt að nota eigin dómgreind. Allt snýst þetta um trúverðugleika. Við erum ekki sjálf á staðnum, tölum ekki einu sinni málið. En mikið af því sem hún fullyrðir rökstyður hún vandlega með því að vitna í opinber gögn. Stundum vitnar hún í heimildarmenn undir dulnefni.

Sumt getum við sannreynt strax. Polítkovskaja segir að í máli umdeilds ofursta, Júrís Búdanovs, hafi í upphafi verið reynt að fá hann sýknaðan af morðákæru í Tsjetsjníu með því að segja að hann hafi ekki verið sjálfráður gerða sinna vegna geðræns sjúkdóms.

Hvert leitaði verjandinn (sem reyndar naut í upphafi fulls stuðnings saksóknarans!) um sérfræðiálit? Til Serbskí-stofnunarinnar sem í tíð sovétstjórnarinnar var látin úrskurða andófsmenn geðveika.

Tamara Petsjerníkova, prófessor við stofnunina, tók þá þátt í þessum andstyggilega skollaleik með fræði sín í þágu Kremlverja. Hún starfar enn hjá Serbskí og niðurstaða Petsjerníkovu var auðvitað að Búdanov hefði ekki verið sjálfráður gerða sinna vegna tímabundinnar geðveiki. Niðurstöðu hennar var síðar vísað frá en tengingin við sovétskeiðið vekur óhug.“

Anna Politkovskaja fannst myrt í lyftu í íbúarblokk sinni í Moskvu hinn 7. október 2006. Enn hefur enginn verið sakfelldur fyrir morðið en síðan hafa nokkrir þekktir samherjar hennar fallið fyrir hendi morðingja.

Rússland Pútíns er fáanleg í öllum helstu bókaverslunum en hana má einnig panta beint frá Urði bókafélagi.

Panta hér

Slóð á viðtal Fréttablaðsins