Franska byltingin eftir Jón Þ. Þór

Franska byltingin olli aldahvörfum og markaði upphaf nútímans í evrópskum stjórnmálum. Hún hófst þegar Parísarbúar réðust á Bastilluna, fangelsið illræmda, hinn 14. júlí árið 1789. Saga byltingarinnar var viðburðarík, átakamikil og blóði drifin en afar áhugaverð og skírskotar á margan hátt til okkar tíma.

Í þessari fróðlegu bók segir frá aðdraganda byltingarinnar sem hófst með því að Loðvík konungur XVI boðaði til stéttaþings árið 1788. Rækilega er greint frá stéttaþinginu sem kom saman í Versölum árið 1789 og síðan er sagan rakin allt þar til Napóleon Bónaparte hrifsaði völdin í Frakklandi haustið 1799. Í bókinni koma margir frægir menn og konur við sögu, þróun byltingarinnar á áratugnum 1789-1799 er lýst og sagt frá kjörum fólks, hárra sem lágra. Einnig segir frá ótal mörgum minnisverðum atburðum sem settu svip á byltingarárin og ekki síður voðaverkum sem voru lengi í minnum höfð í Frakklandi og víðar.